中環出更：何俊賢公路換胎 麥美娟：等睇甩轆
「呢個世界上邊有慘得過，夜麻麻喺條高速公路爆胎先得o架？」何俊賢（高佬賢）呢句說話睇嚟都係唔少車主嘅心聲。佢前晚九點幾，一邊換胎，一邊直播，原來佢喺上水往元朗方向爆胎，為咗慳番千幾兩千蚊拖車錢，於是決定自己郁手換胎。
佢換到埋尾先直播咗幾分鐘，仲一路換一路自言自語，話唔知個直播鏡頭有冇對準佢，又話呢排都唔知行乜衰運，爆胎都爆兩次，仲教大家要點樣扭實啲螺絲，否則喺高速公路甩轆咁點算呀？行車前記得檢查好條車胎呀！
遲咗成個鐘返屋企
佢嘅換胎直播，惹來多名立法會議員「食花生」，工聯會（工記）麥美娟叫佢「出力啦」，又笑佢「留名等睇甩轆」，佢即刻話：「我想死」；同樣係工記嘅郭偉強就話「先（天）將降大任於斯人」。何俊賢太太仲大爆「個衰佬遲左（咗）成個鐘（返屋企）呀」，高佬賢換完留言話要抖順條氣先開車。
事後問番高佬賢，佢話自己換胎，淨係要花幾十蚊補胎咋，準備同研究點換就搞咗十幾廿分鐘，換就換咗十五分鐘，笑稱要練一技之長，冇得做議員進軍F1，多數係工記議員留言，可能係等佢搞唔掂就即時搵工會幫拖喎！
卓妮