中環出更：沈運龍勤返暑期工 同鄰居夾錢買衫有金送
暑假悠悠長，唔少學生哥都會返暑期工賺吓錢，再去買心頭好。早前香港中華廠商聯合會（廠商會）舉行記招公布品牌選舉結果，卓妮同廠商會常務會董沈運龍（Aaron）傾開，佢就話當年一家人同另外十二戶住喺一個五百呎嘅單位，有鄰居收到風話工展會買恤衫送金戒指，佢就攞暑期工賺嘅錢一齊夾份買，但最後點分就唔知嘞，畀父母攞咗去喎。
Aaron又話自己細個好勤力，放五十二日假就返足咁多日工做速遞，每日有十元，以當時嚟計都算收入唔錯。出咗糧之後，佢就走去油麻地，買咗一件價值一百四十元嘅外套，着上身都覺得自己好有型兼感到好自豪。而香港品牌發展局主席黃家和同副主席吳清煥都在場，黃家和就話搵到錢唔會似年輕人咁買嘢玩，只會鍾情買畫，之後掛喺屋企慢慢欣賞，呢個習慣到依家都冇改變。
廠商會常務會董楊華勇（Johnny）小時候都試過為心頭好努力打工，將賺番嚟嘅錢同積蓄一次過投資買一架單車，之後仲會儲錢買零件改車。Johnny又話當年只會喺外婆家門外空地玩，但有次失手炒車，撞傷額頭血流披面，嚇親屋企人，但佢最心痛係架單車花咗。
楊靜難忘當年跌咗買書錢
香港中華出入口商會副秘書長楊靜（Sally）則笑稱，自己愛書如命，以往喺上海過暑假，打工賺咗五元，佢強調當年已經係好多錢，所以打算去買書睇。Sally話去到書局想買書時先發現跌咗錢，一蚊都冇剩，估計係褸袋太淺，跌咗都冇感覺。佢仲話當時買唔到書好失望，好唔開心，就算到依家隔咗咁多年都仲記憶猶新喎。
卓妮