三年兩遭爆竊 白田邨住戶：道閘唔穩陣
【本報訊】深水埗白田邨盛田樓十七年前入伙初期一度爆竊案頻生，近年爆竊問題又再死灰復燃，有單位更慘被爆完再爆，住戶的財產及人身安全不保。本月中旬從內地回港返家時發現再遇竊匪光顧的葉伯稱，前年被爆竊損失一萬元財物後，已把貴重物品搬離單位，今次雖沒有損失，但對單位鐵閘的設計滿肚火：「（房署）快啲幫街坊換晒啲閘啦，完全唔穩陣。」
深水埗區議員甄啟榮透露，今年三月至今，邨內至少發生十四宗爆竊案，主要集中在盛田樓及昌田樓的小型單人單位。甄已多次要求房署正視問題，堵塞保安漏洞，最理想是全面為住戶更換鐵閘，但有關方面未有實際行動回應住戶訴求。
閘底空隙伸手扭鎖即開
七十多歲的葉伯獨居盛田樓，單位採用風琴式摺閘。記者訪問期間，從閘底空隙伸手入摺閘與大門之間，之後在閘門鎖位置一扭，即可成功不靠任何工具打開閘門。葉伯相信本月中竊匪也以類似手法開閘後，再踢爛木門鎖頭入屋搜掠，幸無損失：「依家唔驚啦，鍾意爆咪爆，上次（爆竊）之後都唔再放貴重嘢喺呢間屋。」