江山易改，本性難移。壹淫媒唔止宣淫販賤害人不淺，侵權偷相更係做慣手勢。呢嗱，話口未完又嚟料，壹淫媒旗下嘅爛果報再次不問自取，盜用東方照片，網站登完報紙登，簡直無法無天。結果係點？梗係吃不了兜着走，賠償求和喇。
係咁嘅，東方旗艦網站東網喺今年五月廿六日，刊登騎師田泰安策騎「南波萬」贏得新加坡克蘭芝一哩賽嘅新聞，當中載有五張相關照片，包括田泰安女友及外婆吻賀佢嘅合照。殊不知爛果報見獵心喜，唔該都冇聲，同日晚上就喺網站刊登上述兩張東方照片。咁仲唔止，爛果報食髓知味，翌日嘅馬經版繼續刊登屬於東方嘅照片，擺明視知識產權如無物。
睇到喇，東方努力做好新聞，回饋讀者，爛果報就不勞而獲，坐享其成，有冇再離譜啲呀。真係唔明，「東方做，蘋果盜」呢支歌仔唱足廿幾年，壹淫媒依然以身試法，死性不改，到底係天生賤格難自棄，定係心存僥倖博大霧，唔該漢奸黎出嚟解吓畫好喎。就講今次侵權吖，東方早前發出律師信，爛果報及其網站兩間公司即刻腳軟跪低，刪除有關「罪證」不特止，仲拿拿臨賠償兩萬蚊求和，成隻死狗咁款，早知今日，何必當初吖。
好明顯喇，壹淫媒唔做賊就身痕，多年來侵犯東方版權嘅案底一匹布咁長。九六年嘅「王菲大肚照」事件已經夠晒經典，至於近幾年侵權同樣冇停過，女藝人生B相固然要偷，港姐收兵相又偷，就連港聞相都照偷，鑊鑊偷相鑊鑊「金」，賠錢個金呀，根本唔知醜字點寫。斷正，賠錢，重犯；再斷正，再賠錢，再重犯，到底呢啲係咪心理變態呀？
嗱，有人就舉出月前一宗金舖打劫案嘅被捕疑犯做對比，案中嘅六旬老賊案底纍纍，多次遭法庭重判，大半世踎喺監倉，難得出獄依然賊性不改，獲釋幾日又犯下大案。咦，咁咪同壹淫媒嗰鋪賊癮一模一樣？唔通真係一日做賊，一世做賊？所以話啫，除非壹淫媒永遠消失，否則東方一直要嘥精神捱眼瞓(目及)實呢個慣犯嘅咋。
古人話，「人不可以無恥，無恥之恥，無恥矣。」對住壹淫媒呢啲無恥賤格卑鄙下流之徒，說教盞嘥氣，最好當然係法律制裁，無奈執法部門出名庇奸護淫，充當保護傘都嚟唔切，點敢郁漢奸淫媒一條毛呀。計功夫茶話齋，港府唔敢郁佢啫，個市場會唾棄佢吖嘛，個天會收佢吖嘛，睇吓壹淫媒旗下刊物唔係摺埋就係爽死，剩番吊吊揈嘅爛果報銷量又跌落谷底，怕且唔使幾耐，爛果報想遺禍人間都冇機會咯。