政情：收料站：九西補選 建制撐勿DQ小麗？
自決派劉小麗去年因為宣誓風波而被取消立法會議員資格（DQ），其九龍西議席補選將會喺今年十一月舉行，建制泛民已經密鑼緊鼓咁挑選最佳人選出戰。當中泛民前晚已經開完會協調，民主動力、各民主派政黨等都支持劉小麗出選，前立法會議員馮檢基退出民協後，民協隨即表明支持劉小麗，似乎想同泛民企番埋一齊。劉小麗代表泛民出選已經冇乜懸念，佢面對嘅唯一難題就係選舉主任會否再次DQ佢。
難全取泛民票源
不過，近日建制派有聲音開始提出要畀劉小麗「入閘」，唔好DQ佢，事關劉小麗屬自決派，未必可以全取傳統泛民支持者嘅票，若劉小麗被DQ，就可能要面對吸票能力較高嘅泛民老鬼。無論建制係咪派出前食物及衞生局局長高永文出戰，對手係劉小麗都有着數。高永文如果要贏，就梗係搵個弱啲嘅對手好啦。
另一方面，即使高永文拒絕出戰，由經民聯梁文廣等人頂上，雖然知名度都唔算高，但預計劉小麗攞唔晒啲票，咁就有機會「偷雞」，複製上次九龍西補選建制派鄭泳舜勝出嘅經歷。議席當前，當然就有聲音希望畀佢入閘出戰。
不過，眾所周知，曾參選港島區補選嘅香港眾志周庭早前都因為提倡自決而被DQ，被視為自決派嘅劉小麗，要逃過DQ一劫，睇怕都係困難重重喇！