政情：破例續任薪常會主席 王英偉「仲有手尾跟」
公務員薪俸及服務條件常務委員會（薪常會）主席王英偉，自二○一二年八月起出任主席，已續任兩次，合共做足六年，原定本月底任期屆滿。不過，政府尋日公布再委任佢出任主席，任期只有五個月，雖然任期較短，但仍打破不成文嘅「六六規定」，即同一人不可同時擔任超過六項公職，或出任某公職超過六年，原來今次佢獲破例係因為有手尾未做完。
公務員薪酬檢討未做完
公務員事務局回覆話，薪常會現正就「更完備的公務員薪酬調整機制」下兩項恒常進行嘅調查，即薪酬水平調查和入職薪酬調查進行檢討，預計於今年年底前完成，檢討結果對未來進行嘅公務員薪酬調查有重大影響，而王英偉一直帶領薪常會作廣泛討論，以及主持不同職方諮詢環節，所以佢再獲委任留任至本年年底以完成呢項檢討。