政情：賴港人曲解問責張炳良鑊鑊免責
問責官員近年經常被批評，做錯事都唔使受懲罰或下台，體現唔到問責制精神。運輸及房屋局前局長張炳良尋日出席新書發布會時，就話「問責」呢個名不但係錯，意思仲被港人扭曲添，話政府推行問責制，其實本質係「政治委任制」至啱喎！過去幾屆政府確實有問責官員因醜聞或過失而問責下台，唔通張炳良認為佢哋唔應該下台？定係以為改個名就唔使問責呢？
批問責制改錯名 變追究文化
張炳良作為前問責制官員，認為官員問責係解釋自己嘅決定同承擔後果，但目前嘅制度能否充分發揮呢個作用，就好視乎社會點樣理解，仲話問責制推行咗咁耐，到底係「政治責任」定係「行政責任」都未搞清楚，又點樣體現問責呢？佢又話，如果一旦出事就要引咎下台、人頭落地嘅話，按此邏輯一路推落去，就所有責任都落在特首身上，又話「問責」兩字遭曲解，所謂問責文化其實已變成追究文化。
講真嗰句，佢任內爆出鉛水事件、南丫海難等事故，鑊鑊新鮮鑊鑊甘，但大家點樣追究責任，佢都冇承擔後果問責下台啦，仲肥肥白白咁做到屆滿卸任添！所以無論叫「高官問責制」或「政治委任制」都好，結論係官員根本唔使問責，如果被議員同市民追究責任或鬧兩句都話唔得，呢啲就真係唔知咩文化嘞！
張又話，政策好難喺議會順利通過，要解決呢個問題，從政人士最好係來自政黨，政府亦要由政黨輪流執政，當在野勢力都有機會掌權，自然會明白施政嘅困難，社會亦可以平和一啲。
立法會前議員劉慧卿亦有去踩場質詢張炳良，話以前大家都係民主黨，但係張做官嗰陣，咁耐都只係見過佢兩次，仲有議員同事引述張話，議員同官員係競爭關係，所以議員嘅意見不一定支持，要求張即場解釋。張就死兜話，行政同立法角色唔同，所以存在競爭，但並不代表惡性，可以互補，喺唔同位置有唔同睇法，希望唔好用敵我態度看待咁話。