中環出更：書展爆響口 黃偉綸：警察唔一定係好人
好多人出咗社會工作後，都會少咗睇書。發展局局長黃偉綸（Michael）就仍然保留睇書嘅習慣，佢尋日去書展向年輕人推介一本書時，突然爆seed話：「警察都唔一定個個係好人」！不過佢又無講明係來自邊度嘅警察。
引述東野圭吾作品內容
話說Michael推介日本名作家東野圭吾嘅作品《第十年的情人節》，仲講起東野圭吾嘅人生。佢話，東野最廣為人知嘅著作係《神探伽利略》，而東野亦係日本「社會派」作家，即係寫出當時社會上弱勢社群所面對嘅困難。
佢又話，香港有好多問題，香港以外亦有好多問題，最鍾意東野話「罪犯未必係壞人，犯罪有好多客觀原因，有值得同情嘅地方，同樣警察都唔一定個個係好人」，話睇書可以反映到好多現實嘅事。
另外，佢又話不時都會行書局，習慣買紙本，不過成日被環境局局長黃錦星「提點」，依家都收手唔敢勁掃喎。
卓妮