中環出更：自學書法唔滿意盧文端想拜師
今時今日唔少學生都參加好多課外活動，有人鍾意打波，有人鍾意音樂，而其實學書法、繪畫嘅都唔少o架！卓妮最近喺香港中華文化總會嘅書畫攝影展上撞到香港福建社團聯會永遠名譽會長盧文端，原來佢最近都開始學書法，佢話由細到大都冇乜接觸過文化藝術嘅嘢，對書畫嘅認識好少，不過就覺得文化藝術有助提升個人修養，所以雖然年近七旬，但都趁最近比較空閒走去學書法，至今學咗半年已經似模似樣，絕對唔會輸畀啲後生仔啊！
不過話學都唔係咁容易嘅，事關盧文端冇搵老師，就咁買咗宣紙、毛筆、墨後，就自己試下寫，寫咗半年雖然有啲進步，但佢就唔太滿意，因為寫書法時，支毛筆要好直，佢隻手唔係好夠力，考慮緊係咪應該跟老師學。查實佢結拜兄弟施子清就係書法家，唔知盧文端係唔係打算向佢請教呢？
賴榮春公司劃房專門畫畫
饒宗頤學術館之友創會主席孫少文都好鍾情文化藝術，除咗係書畫收藏家外，亦都有開辦藝術館，佢話藝術冇分年齡、時間、地域，只要表達到藝術品背後嘅精神，就可以畀唔同地方、年紀嘅人一齊欣賞，仲話近年學書畫嘅人愈嚟愈多，當中老中青都有，最細個連幼童都有！孫少文大讚好多香港年輕人都好有潛質，相信未來香港藝術界會有好多新星。
鮮花盆栽批發商會主席賴榮春今次有份參展，展示咗五幅書畫作品，佢話其實已經畫咗好多年畫，早年做醫生嘅時候已經成日畫，後嚟去咗賣花就畫得仲多，佢甚至喺公司劃咗一間房，專門用嚟畫畫，當日想畫咩花都可以即時喺公司搬一盆入房對住畫，非常方便！佢仲話間房有時會用嚟招待朋友、學生，一齊畫畫方便交流咁話。
卓妮