都話第一反應最真實，呃唔到人，好似尋日咁，律政司被問起幾時先至捨得起訴漢奸黎恐嚇東方報業記者案，竟然鬼拍後尾枕，自爆佔中案都拖咗幾年未有下文，言下之意係拖得有道理，等得到你就等。唔止無私顯見私，直情真情流露，庇奸護淫之情溢於言表喇。
嗱，醜婦終須見家翁。漢奸黎喺舊年六四集會公然爆粗辱罵兼恐嚇東方記者，過程被攝錄機拍下，全世界都知呢條契弟有幾咁猖狂。點知事隔逾一年，律政司依然唔嗲唔吊，東方八度去信質詢幾時至肯將漢奸黎落鑊，捍衞新聞自由，為記者伸冤，但律政司一直諸多迴避，唔係答虛話、廢話，就係睬你都傻。不過逃避唔係辦法，尋日嘅立法會大會，律政司終於避無可避嘞。
話說有議員睇唔過眼，向律政司開火，質問係咪知名人士有特權，涉及刑事恐嚇都可以甩身，咁樣落去，新聞界士氣必然大受打擊。律政司見勢色唔對，唔敢寸寸貢嘞，強調檢控一視同仁，視乎有冇充分被法院接納嘅理據、係咪符合公眾利益等原則處理喎，仲話唔會因為涉案人身份而差別對待。
講就好聽咯，其實咪又係廢話，最好嘢都係律政司居然拖埋佔中案落水，話當局拘捕咗四十八名佔中搞手，最終只係起訴九人，而且拖到今年十一月至正式開庭，原因就係證據繁多，需時研究，唔可以將個別被捕人士「斬件式」處理喎。好心啦，漢奸黎恐嚇東方記者案有圖有片，鐵證如山，涉案人由頭到尾只有兩個，案情簡單清晰，毫不複雜，根本唔存在「證據繁多，需時研究」，更唔存在「斬件式」處理，何況新聞自由絕對涉及公眾利益，律政司夾硬將兩單唔同性質嘅畸士相提並論，擺明強詞奪理，愈描愈黑啫。再講吖，佔中案死拖爛拖，早就激起民憤嘞，律政司仲夠膽死攞出嚟講，九唔搭八，知唔知醜o架？
仲有喎，根據《罪行受害者約章》，律政司必須於十四個工作天內答覆受害者對案件嘅查詢，東方及受害記者先後多次去信都係得個吉，律政司公然違反服務承諾，知法犯法，唔怪得香港變得無法無天喇。難為佢哋仲好意思話冇延遲或不回覆受害者嘅紀錄喎，梗係冇喇，律政司根本當受害者冇到，所有查詢石沉大海，點會有紀錄吖。
冇計嘞，反中亂港逢凶化吉，愛國愛港粉身碎骨，就係今日香港嘅寫照。有大大把司法保護傘撐腰咯喎，莫講話恐嚇記者冇事，策劃違法佔中冇事，怕且殺人放火都唔慌有事，呢啲就係做漢奸洋走狗嘅特權，唔恨得咁多！