西鐵線元朗站早前被揭橋躉出現沉降問題，有立法會議員不滿政府冇主動公布事件，而喺尋日嘅立法會會議上提出質詢。點知署理運輸及房屋局局長蘇偉文就話類似情況並不罕見，更自爆輕鐵天榮站都因沉降問題而需要停工，再次印證政府唔問就唔答嘅作風。難怪提出今次質詢嘅議員鄺俊宇嬲爆，怒斥蘇偉文唧牙膏式回應喇！鄺俊宇仲不滿政府輕輕帶過，所以要去信運房局同港鐵了解情況，唔知到時會唔會又唧出更多問題呢？
