政情：去過遊樂場玩 劉江華自稱街童
街童原本係泛指一啲無家可歸或者無大人看管嘅兒童，通常會連帶出現拾荒、行乞或偷竊等行為問題。民政事務局局長劉江華尋日喺立法會大會上，竟然自認做過街童，唔知佢細個有幾悽慘，後嚟做到局長背後嘅奮鬥故事又係點？
事緣近年香港兒童遊樂場嘅設施愈嚟愈單調，唔少議員向劉江華反映遊戲設施太悶，完全吸引唔到兒童去玩。民主黨議員鄺俊宇質問劉江華時話：「局長你細個都有玩過o架嘛？」劉江華都答得好爽快：「有啊，我細個都係街童嚟！」然後就講番兒童遊樂場嘅情況。咁睇嚟劉江華口中嘅街童，應該只係指經常落街玩嘅兒童，而唔係真正嘅街童喎！
議員批評設施太悶
講開遊樂設施嘅問題，好幾位議員都批評韆鞦、繩網、馬騮架呢啲設施愈嚟愈少，經常得番啲搖唔郁嘅搖搖騎，同埋唔使一秒就滑完嘅滑梯，追問可唔可以加番一啲有難度嘅設施。劉就話要顧及安全同刺激性，盡量會做到平衡喇！