中環出更:棄連任財會副主席 田北辰反薦葉劉

身兼立法會鐵路事宜小組委員會主席嘅立法會議員田北辰(田二少),早前因提出要求引用《立法會(權力及特權)條例》調查沙中線醜聞,遭部分覺得被擺上枱嘅建制派圍插,動議最後被否決。田二少當時已大呻覺得畀人玩,仲話做小組委員會主席冇意思,點知尋日佢就明確話唔再角逐連任財務委員會副主席,仲建議由佢前黨友、立法會議員葉劉淑儀(葉劉)接任喎。

田二少解釋唔連任嘅原因時話,如佢做副主席,反對票就唔可以投太多,亦講唔到心入面嘅說話,主持會議時有問題亦問唔到。咁邊個做副主席好呢?估唔到佢推薦早前喺佢想提特權法議案調查沙中線問題時狠插佢嘅葉劉,話「最硬淨嗰個,葉劉淑儀吖嘛!」真係隔空都聞到陣火藥味。

葉劉:冇興趣做「虛位」

葉劉回應時就話,財委會主席陳健波(波哥)做得好好,副主席只係「虛位」,佢冇興趣做。至於波哥被問到佢嘅接任人選時,就指住咁啱喺附近嘅金融界議員陳振英,話︰「人選咪喺度囉!」又話如果大家同意,都可以畀泛民議員出任財委會副主席喎。

卓妮

第一手消息請下載on.cc東網iPhone/iPad/Android/Windows Phone Apps