中環出更：翟健民細說中東與青花瓷淵源
中華廠商聯合會永遠名譽會長李秀恒（Eddy）係攝影發燒友，經常為咗影相而周遊列國，影埋咁多靚相，最好就係出書留念啦！早前佢就出咗本攝影集，透過鏡頭探索一帶一路嘅商機、風貌及人情，仲舉行慈善展覽，為香港中華文化藝術推廣基金籌款。被稱為「香港瓷器大亨」嘅古玩專家翟健民（William）都有去捧場，佢見到中東國家嘅相特別有興趣，原因係同中國青花瓷嘅前世有關喎。
William話中國同中東文化有幾百年嘅淵源，好多中國嘅文物，例如金銀器同陶瓷都與中東有關。佢指住其中一幅烏茲別克嘅列基斯坦廣場照片，話啲建築外牆嘅瓷磚圖案正正係中國青花瓷嘅來源，事關明朝永樂帝派鄭和下西洋，鄭和就將呢啲文化元素帶番中國。William講得好投入，仲笑言研究呢啲典故好有意思添！對玉器古玩都有研究嘅翟太劉惠芳就話，土耳其嘅瓷磚都係呢啲圖案，早前佢哋仲特登去土耳其尋秘添！
李秀恒教影景點相靠「人」
香港福建社團聯會永遠名譽會長盧文端同保良局前主席陳亨利都有去捧場，盧好認真咁揀選心頭好，仲買咗一幅俄羅斯街景相，因為當地建築物造型有特色，色彩亦好突出，話掛喺背景素雅嘅地方特別好睇喎。佢亦睇中一幅高加索地區風景相，中華出入口商會榮譽會長莊成鑫同樣好鍾意，唔知最後邊個爭贏呢？
Eddy分享影相嘅心得時話，去到一啲著名嘅景點影相，個個影出嚟嘅都差唔多，佢嘅貼士係要善用現場人物，令構圖更豐富，咁就係獨一無二嘅靚相喇！
卓妮