政情：今日你上鏡：內地買塊地 蔡雋思學做酒生意

中華總商會會長蔡冠深家族生意係以海產批發起家，依家已擴展到金融、地產、科技及文化等，業務多籮籮。蔡冠深最近就鼓勵幾個囝囝學做酒生意，大仔蔡雋思早前去咗法國參觀一級酒莊，唔通蔡家準備進軍酒業？蔡冠深太太關穎琴笑笑口話，佢哋最近的確喺內地寧夏買咗六十六平方公里土地，打算種植葡萄自行釀酒，所以連喺英國倫敦大學讀緊書嘅捷思都趁暑假到巴黎讀法文，蔡冠深都趁去歐洲公幹時帶埋佢去波爾多參觀酒莊，睇嚟蔡家第三代又多一個可以發揮嘅生意喇！