正當唔少人都關心緊泰國北部清萊府班足球小將，唔知幾時至學識潛水、幾時至走出被困多日嘅洞穴之際，其實講到「潛水」喇喎，近排涉及沙中線多宗工程醜聞，但一直冇現身解畫嘅外資承建商至係潛水專家。由醜聞爆出到家陣，潛水成個月有多，而且仲有繼續潛落去之勢，連港府同港鐵都吹佢唔脹呀。
呢，尋日立法會鐵路事宜小組委員會召開特別會議，討論醜聞爆到九彩嘅沙中線土瓜灣站同會展站工程問題。當中喺會展站工程冇放置足夠橫向支撐嘅大判「禮頓」及其聯營承建商，雖然被三催四請出席會議，但一樣睬你都傻。總之你有你請，佢有佢唔到，當局根本奈佢唔何。港鐵代表話禮頓「要專心準備月中交畀政府份報告」喎，仲煞有介事話會考慮禁止禮頓投標港鐵將來嘅工程咁話，聽住先喇，喺立法會投票表決授權動用特權法調查沙中線工程醜聞時，咪再一次被建制派否決，禮頓有排都唔使驚啦。
講真，禮頓喺沙中線工程接連爆出醜聞後，可以一味潛水唔出嚟交代，有立法會議員之前就講出咗重點，全因禮頓手上有多項數以百億元計嘅港府工程合約，「大到不能倒」，莫講話港鐵，就連港府都冇佢符。屈指一數，無論港珠澳大橋、中環灣仔繞道、蓮塘香園圍口岸、東九文化中心定係將軍澳藍田隧道，禮頓全部有份玩，就算鋪鋪延誤超支，「御用承建商」嘅地位依然穩如泰山，話當中冇古怪都實在好難講得通囉。
再者，沙中線醜聞如果冇港府監管不力同港鐵層層隱瞞，點可能「順利誕生」吖，證明冇人係無辜，港府同港鐵都係罪人。大家都知，雖然港府每年就沙中線項目要畀約十億元管理費過港鐵，但係港府同港鐵有合謀隱瞞高鐵延誤超支嘅前科，運房局光頭局長又話睇報道至知工程出問題，當中有冇互相包庇扯皮，實在係耐人尋味。所以呢，立法會否決動用特權法一啲都唔出奇，一旦馬桶蓋揭開，港府同港鐵一身腥仲得了咩。
講開又講，如果港府唔係迷信洋和尚會唸經，將大部分基建工程判畀外資公司做，醜聞或者可以避免。尤其係蓮塘香園圍口岸工程曾發生致命工業意外，禮頓只被輕罰十萬元咁大把，相比起港府幾十億、幾百億元巨額合約算係乜呢？港府賞罰不分，大鑊爆完又爆又有乜出奇？
都係嗰句喇，港府冇心冇肺冇靈魂，唔止寵信洋人，仲要瞇埋眼監管基建工程，沙中線醜聞只係序幕咋，更多更大嘅亂象一定陸續有來呀。