港鐵沙中線工程接連出事，包括紅磡站爆出月台鋼筋剪短造假、土瓜灣站月台結構牆被揭削薄鋼筋、會展站亦傳出施工問題，負責「拆彈」嘅運輸及房屋局局長陳帆真係拆極都唔掂。佢尋日去立法會鐵路事宜小組委員會繼續解畫，小組委員會最後通過咗冇法律約束力嘅臨時動議，要求佢問責下台。咁啱政府就公布，陳帆今日起休假，直至下周五先至回任，期間由運房局副局長蘇偉文兼任局長。陳帆放足六日大假，都可以暫時避吓風頭，但放完假都係要返回現實，想甩難都幾難。
