政情：中東擺珠寶展 冼雅恩入鄉隨俗
近期珠寶店多次成為賊人目標，但從事珠寶業嘅香港青年工業家協會常務副會長冼雅恩就話唔太擔心，因為佢並非做珠寶零售，反而參加外國珠寶展時，令佢覺得營商入鄉隨俗好緊要。
了解當地文化莫犯禁
冼雅恩以前參加過喺中東舉行嘅珠寶展。佢話嗰陣啲當地女性試戴珠寶時，佢都同平時一樣金睛火眼望實，避免有人順手牽羊、偷龍轉鳳。不過，原來當地女性雖然只需用頭紗遮住面部，但男性都唔可以直視佢哋任何身體部位。佢當時就犯禁望咗佢哋對手，好彩在場有其他女同事可以同佢交換崗位。
佢又話，去外國最重要係入鄉隨俗，行商場就可以了解當地文化。而同外國人營商更要事前做足功課，歷史、飲食、文化等都要了解一下，好似佢所做嘅珠寶款式都有顧及唔同國家嘅宗教背景，好似星形、十字架等就唔適合伊斯蘭教國家咁話。