政情：機場跳快閃舞 蘇澤光玩埋一份

同林天福壓軸登場

話說香港國際機場啟用二十周年，五百名來自機管局、航空公司、地勤公司、機場保安及其他機場業務夥伴嘅員工就大跳快閃舞慶祝。

快閃舞先由幾名機場員工唱出悅耳歌聲，為表演拉開序幕，隨着音樂節奏加快，其他員工亦陸續加入。蘇澤光就同機管局行政總裁林天福壓軸登場，仲同圍觀嘅旅客一齊拍手，場面熱鬧。整段快閃舞歷時約十分鐘，表演者最後列隊組成數字「20」，寓意機場踏入廿歲。

機管局尋晚亦舉行酒會，蘇澤光講起第一次搭飛機時有十六名家人送機，當時香港人好鍾意機場，又話機場服務不容有失，去年五個颱風襲港，都係員工負責處理，所以佢要「送大禮」，宣布機管局員工由尋日起每年都有一日生日假，咁真係皆大歡喜喇。