政情：搶修例鬧雙胞鄭若驊未瞓醒
律政司選擇性檢控、應告唔告一直為人詬病，原來在完善法例方面都係「Hea做」，近日就爆出同立法會議員鬥快提出修例，鬧雙胞醜聞！話說下周三立法會大會將審議由律政司司長鄭若驊提交、根據《致命意外條例》動議嘅擬議決議案，將廿一年來都未修訂過嘅「親屬喪亡之痛」定額賠償金額調高，但動議就同議員許智峯（峯鴿）提出嘅決議案內容完全一樣。鬧雙胞嘅背後，揭發律政司一直歎慢板，被議員踢一踢先至肯郁一郁。
根據立法會文件，鄭若驊喺六月廿八日預告將於下周三大會上，動議將《致命意外條例》中有關「親屬喪亡之痛」定額賠償金額，由目前十五萬元調高至廿二萬元，而七月三日峯鴿先預告會作同樣嘅修訂。不過，翻查文件，峯鴿喺四月十八日已去信秘書處提出動議，到底四月至七月期間發生咩事？
今年三月，峯鴿開記者會指律政司曾於九七年答允會就「親屬喪亡之痛」定額賠償金額兩年一檢，跟通脹調整金額，但至今廿一年未有更新，所以佢準備提出決議案修訂，隨後諮詢律政司及各持份者，到四月只有律師會回覆表示支持。峯鴿隨即提出動議，點知遭律政司反對，指議員唔可以提議案以增加公帑額外開支，立法會主席梁君彥就決定「等埋政府」。其後律政司補鑊，將修訂事項擺上司法及法律事務委員會討論，梁至上周先作出裁決，准兩項議程一齊提交大會。
律政司唔熟條例 亂反議員提案
峯鴿炮轟梁君彥「吹黑哨」，如果唔係要「立法配合行政」，早喺四月已可處理其決議案，使乜等到依家？峯鴿直斥律政司後知後覺怕尷尬，由議員提議案修訂法例，等於證明律政司廿一年嚟冇做嘢。我哋向多位資深立法會議員查詢過，眾人印象中都未見過由政府同議員提出完全一樣嘅議案，相信今次係開創先河！
根據《議事規則》政府議案行先，然後再審議員議案，但今次就破格將峯鴿議案提高放埋政府議案一欄作合併辯論。據了解，屆時只就政府議案投票，即峯鴿只賺取動議人優先發言時間。不過，翻查《致命意外條例》，已列明立法會可透過決議案修改「親屬喪亡之痛」定額賠償，但鄭若驊竟稱議員議案會額外增加公帑開支而提出反對，難道作為司長嘅佢都唔熟書？抑或係瞓咗呢？
鄭若驊喺文件中解釋，指律政司過去有檢討賠償金額，而在一四年曾建議將款額增至十九萬元，但因律師會及大律師公會提出反建議，認為金額增幅要一併考慮「本港不斷轉變的社會和經濟狀況」，故要再作諮詢及研究。不過，律政司依家先提修訂，點解要研究四年咁耐呢？