中環出更：旅檢大樓漏水 蔣麗芸：冷氣滴水緊要啲
港珠澳大橋香港段醜聞不斷，之前就已經爆出人工島飄移、石屎測試造假等，早前香港口岸旅檢大樓亦被揭有漏水問題，近期更惡化到電機房都水浸。立法會內務委員會尋日討論議員就旅檢大樓漏水問題提出急切口頭質詢事宜，期間向來語出驚人嘅議員蔣麗芸（Ann）就話，旺角同深水埗嘅冷氣機滴水問題仲緊要喎。
話說議員譚文豪計劃下周三喺立法會大會就旅檢大樓漏水問題提出急切質詢。尋日會上佢就展示大橋漏水相片，話可能都係因冷氣機滴水所致，滴到幾吋深，搞到好似水簾洞咁，令人擔心會引致漏電，所以議員應該支持佢提出急切口頭質詢，要求政府交代。
話對市民影響更大 應獲批
Ann就話對呢個急切質詢無乜大意見，但就認為如果立法會主席梁君彥今次批准，日後對市民影響更大嘅議題都應該獲批。而佢口中嘅更大嘅議題，原來就係冷氣機滴水。佢仲話旺角、深水埗一帶因近期天氣炎熱，多咗市民用冷氣機，搞到冷氣機滴水滴到街道都濕晒，直言對問題非常不滿，希望梁君彥日後都可以批准呢類質詢咁話。究竟冷氣機滴水同旅檢大樓漏水係咪可以相提並論，真係見仁見智喇。
卓妮