中環出更：李誌峰自創冇酒雞 吳國安讚好玩
估唔到一杯雞尾酒都可以玩出一盤生意。早前香港鐘表業總會前副主席徐珊雯（Elise）相約一班好友到九龍東區各界聯會會長李誌峰（Reynold）旗下主題餐廳飯敍，講起飲酒，在場嘅中華廠商聯合會副會長吳國安話，經常要趕場出席應酬活動，為免過唔到酒精測試都盡量唔飲酒，但有時盛情難卻，真係幾難做。Reynold聽完笑笑口話有計，事關佢哋自創咗一隻「冇酒雞」，仲打算申請專利添。
冇酒雞？眾人初時以為係咩必試嘅「唔好走雞」特色菜，定係一款冇落酒煮嘅雞，原來係講緊不含酒精成分嘅雞尾酒。Reynold話，佢鼓勵員工發揮創意，呢款無酒精雞尾酒就係佢哋嘅九十後酒吧師傅調製出嚟，佢哋仲有一款冬蔭功雞尾酒添，同樣好受歡迎。吳國安大讚好玩同有賣點，仲即刻捉Reynold入會，話佢咁有創意，又主打香港品牌，假以時日可以競逐香港名牌喎。
吳宏斌將去埃塞俄比亞考察
講開生意經，Elise啱啱去完東非國家肯尼亞考察，發現有唔錯嘅機會，因為當地接近八成人口年齡不足三十五歲，且電子商貿及科技好發達，已經有一班消費能力高嘅人，所以好適宜港商去開拓小商品生意。
廠商會會長吳宏斌（斌哥）咁啱九月亦會帶隊去非洲國家埃塞俄比亞考察，事關佢係該國駐港澳名譽領事。斌哥話，埃塞俄比亞嘅咖啡好出名，依家就全力發展輕工業，佢已經十幾年冇去過，此行主要係去睇工業園，為港商尋找新商機。
卓妮