恭喜林鄭，賀喜林鄭。雖然佢上任一年來毫無建樹，不過尋日七一上街遊行人數又真係比往年少咁一大截，證明佢吼準七一前夕，就房屋問題使出掩眼法，的確淋熄咗唔少民怨，冷卻咗唔少市民上街遊行嘅火氣。雖則七一呢關畀林鄭符碌過骨，但新房策有冇料到，好快見真章，呃得一時唔呃得一世吖！
咪睇林鄭嗰套「三個目標、六項措施」房屋新政策好似好大堆頭咁，又話開徵一手樓空置稅，又話將小部分私樓用地改作資助房屋用地，又話將居屋、綠置居同港人首置上車盤同市價脫鈎，等無殼蝸牛可以用更平價錢買入政府資助房屋，動作多多，查實只係門面工夫擺姿態，連林鄭自己都話呢啲虛招對壓抑癲價樓市冇效，對增加房屋供應冇符。港府拓土建屋無方，卻一味耍花招，分明係「空」手道搵市民笨。
大家有眼見，雖然部分地產商鬼殺咁嘈，鬧爆政府開徵新稅霸王硬上弓，又話真正空置單位相對需求杯水車薪，根本解決唔到土地供應不足嘅問題，但唔理點都好，既然「有人冇屋住，有屋冇人住」，推空置稅無可厚非，仲可將覓地建屋無能隻鑊射歪，矛頭直指地產商囤積居奇，庫房順手刮多筆之餘，又可以吹噓現屆政府完成前人未竟之業，一石多鳥。問你服未！
所以話，港府除咗對丟空養蚊嘅一手樓開徵空置稅，更應該對無所作為、形同虛設嘅高官開徵「官非所值稅」。功夫茶敢寫包單，林鄭夠膽提呢項新稅，除咗市民對佢嘅「管治新思維」拍爛手掌，立法會亦肯定喺冇爭議下全票通過，連嗰班為反而反嘅反對派政棍都會舉腳贊成，亦冇人敢再鬧佢整色整水。林鄭咪成日話要「大和解」，要把握改善行政立法關係契機嘅，呢個就係黃金機會嘞。
真係有得諗o架！林鄭管治班子每年淨係人工，已經浪費緊納稅人超過一億二千萬元，呢班領取住全球數一數二高薪嘅三司十三局，過去一年完全冇做好份工，律政司對壹淫媒老闆漢奸黎舊年六四涉嫌刑恐東方記者單嘢，拖拉成年冇聲冇氣，對正義傳媒八度去信質詢檢控進展，闊佬懶理睬你都傻；加埋喺港鐵沙中線連串工程醜聞中明顯監管失職、仲夠膽死厚住面皮話「睇報紙至知」嘅運房局，沒有最離譜，只有更離譜。如果班廢官好似過關走紅色通道咁，申報冇做咩分內事再交「官非所值稅」，睇怕佢哋嘔凸都似。
一句到尾，港府濫竽充數，拉雜成軍，庸官劣吏當道，作為群蟲之首嘅林鄭房策唔掂，與其將個波大腳傳中，搞乜鬼拓土公眾諮詢，不如帶領一眾無能官員納稅還富於民好過喇！