政情：成立新協會何偉權緣續助更生
何偉權（Ken）自從舊年底卸下商界助更生委員會主席職務之後，就好少喺公開場合出現。最近佢又密密出動，事關佢心中仍有一團火，於是夥同一班城中商界同教育界好友，創辦香港睦群助更生協會（協會），下月中旬將舉行創會就職典禮添！
辦粵劇慈善晚會籌款
Ken從事協助更生工作十幾年，似乎已上癮。佢話對在囚或更生人士伸出援手，已令香港嘅重犯率年年下降，成為全球最安全城市之一，社會付出嘅成本亦慳番唔少，過去五年省下七百幾億元。協會除咗繼續踏步向前走助更生之路，仲會關注青少年教育及弱勢社群。
過去Ken搞咗唔少叫好又叫座的助更生項目，今年十一月協會的頭炮重點活動，就係籌辦一個大型粵劇慈善晚會，為在囚人士教育基金籌款。點解咁關注在囚人士教育問題？佢笑笑口話，畀有上進心嘅在囚人士得到較高層次教育，唔單止佢將來出獄時多一份工作保障，亦可對社會散播正面的激勵作用，可謂一石二鳥咁話。