政情：翻舊帳爆罵戰陳勇辣㷫鄭松泰

陳勇喺節目開首就話過去一年立法會拉布減少，認為香港政治氣氛變得祥和，仲笑指有建制派微言，指政府似乎對泛民更好喎。呢番開場白冇乜火花，但之後就絕對唔祥和，事關當鄭松泰質問其他嘉賓時，陳勇率先發炮，翻鄭松泰舊帳，指法律面對人人平等，就好似鄭松泰侮辱五星旗都要接受法律制裁，但鄭松泰竟然唔使負責任喎。

重提侮辱五星旗 鄭反嘲「維園阿叔」

鄭松泰聽到當然立即反擊，解釋已經因為事件而被罰款，反問陳勇係咪未瞓醒同中暑，又問佢返嚟香港未，似乎有啲人身攻擊。雖然陳勇被人反駁，但未有停落嚟，仲話罰錢並非一了百了，又指鄭松泰月薪近十萬元，質疑佢係咪只要繼續繳交罰款就可以日日侮辱五星旗同區旗，批評佢作為立法會議員都唔尊重法律。最後就搞到鄭松泰都無佢咁好氣，提醒佢離題要返回主題，又慨嘆陳勇似「維園阿叔」。

跟住區諾軒就批評政府態度高傲，認為呢種態度反映出政府點看待一國兩制。陳勇聽完又食咗火藥，反問區諾軒有冇遵守憲法同《基本法》，仲話如果佢守護法治，就唔好參與佔領同旺角暴亂，作出違法行為喎。佢之後仲話根據《基本法》去DQ（取消議員資格）違法人士，同埋將違法人士繩之以法，先令議會回復正軌、社會和平。而區諾軒就同鄭松泰一樣，停唔到步步進逼嘅勇哥，惟有批評佢唔對題同自說自話。

陳勇之後更話只要鄭松泰同區諾軒選擇做忠實、建設性反對派，都會獲大家理解同尊重，因為佢哋只為監督政府，仲話市民要對香港同國家有信心，因為近年有成績，如果有人覺得絕望，就移民去太空或者火星喎。