中環出更：勞工組糾紛發酵 再有區議員退街工
街坊工友服務處勞工組糾紛繼續發酵，雖然勞工組三人仍有糧出，但未來路向仍不明朗，令街工部分成員為此感到不滿，爆出退黨潮。被視為街工繼任人嘅葵青區議員黃潤達尋日正式退黨，原來連同屬葵青區議員嘅梁錦威都退出街工，兩人共同進退。
據了解，黃潤達喺退出街工職員群組前，有向成員作「最後道別」，稱自己投入街工接近十六年，有好多不同感受，但天下無不散之筵席，籲大家展望將來，佢亦會繼續為基層、勞工同弱勢爭取權益，希望他日仲可同街工成員合作。而梁錦威回覆查詢時確認退黨，稱因為勞工組事件感到不滿。至於日後會否加入其他政黨？佢就話暫時未有考慮。
七一遊行無擺街站
由立法會議員梁耀忠（阿忠）領導嘅街工，最「鼎盛」時有五位區議員，自一六年發生阿忠做「逃兵」事件後，一波又一波嘅退黨潮出現。截至尋日，街工只得番兩位區議員，即阿忠及葵青區議員梁志成。
另外，一向為勞工發聲嘅街工，竟然喺七一遊行並無擺街站，只有小量成員喺維園集合跟大隊遊行。以此局勢，假若接下來兩場換屆選舉中，街工再無「進帳」，或意味着該黨會逐步走向夕陽。
卓妮