中環出更：香港醫療存隱憂 周伯展呻資源唔夠
香港商業專業評審中心（中心）日前舉行新一屆執委會就職，兼嘉許卓越商業機構同本地品牌，以促進香港專業服務嘅發展。其實傑出嘅香港專業服務有好多，醫療就係其中之一，香港眼科醫學院前院長周伯展話香港嘅醫療服務相當出色，但礙於資源分配嘅問題，香港要維持數一數二嘅醫療水準係存在隱憂，佢認為市民大眾對醫療嘅需求係永無止境，政府不但要增聘人手以紓緩醫生嘅工作負擔，亦須撥出資源用於醫學研究以防止病症蔓延或惡化。
周伯展以本行眼科為例，話雖然香港有針對視力問題嘅醫療專才，由基因至臨床醫治都有心得，惟缺乏資源難以進一步深化研究，否則可以為大眾嘅視力健康作出貢獻。佢話數年前新加坡有感視力良好嘅戰鬥機駕駛員難覓，於是衞生部同國防部都相繼投入資源，成立研究機構以期改善國民視力，而新加坡嘅做法值得香港參考。
朱雯廸籲建立消費者信心
在場仲有中心嘅常務副會長魏麗霞、張繼東同朱雯廸。本身經營美容產業嘅朱雯廸認為一個行業嘅發展，除咗政府嘅支援外，點樣建立消費者嘅信心亦都好重要。佢話港商喺內地生產嘅美容產品，論質素同國際品牌相比一啲都唔輸蝕，然而礙於過去內地嘅質檢工作做得唔夠好，導致消費者覺得本地貨始終及唔上來路貨嘅印象。
轉頭見到中心嘅榮譽會長余壽寧就話歐洲好多老牌企業，其品牌之所以成為信心嘅保證，端賴百年以上嘅品質控制同服務承諾，本地企業要享譽國際，相信都要經歷一段漫長歲月先至做得到。
卓妮