反中亂港了不起 愛國愛港鳥不起

愛國有罪 賣港有獎

可惜吖，理想很豐滿，現實很骨感。咪睇國家經濟總量已位居全球第二，但唔係富強，而係水腫，關鍵時刻鳥不起，如果唔係，香江反對派同埋港英餘孽就唔會咁猖狂嘞。大家有眼見，中央有中央話要落實香港全面管治權，港府有港府陽奉陰違，反對派有反對派有恃無恐。好似漢奸黎，回歸咁耐，搞風搞雨搞足咁耐，但你咪理，契弟出錢出力指揮策劃佔中，冇事；黑金收買政客，冇事；就連眾目睽睽之下爆粗恐嚇東方記者兼打壓新聞自由，一樣冇事，吹脹，你話港府唔係同漢奸黎打龍通，搵鬼信咩，真了不起！

講開漢奸黎恐嚇東方記者單畸士，真係唔到你唔服。事發超過一年，東方八度去信律政司要求交代檢控進展，但律政司唔係活死人咁冇嚟反應，就係講一堆虛話、廢話，甚至連「要諮詢法律意見」都噏得出口。法律權威部門居然要向人諮詢法律意見，有冇再廢料啲呀？仲有咩存在價值呀？外部勢力老虎屁股唔敢摸，洋奴漢奸走狗尾巴唔敢碰，律政司庇奸護淫，自毀法治長城，完全係飛唔起嘅雀仔，真鳥不起！

咪以為了不起嘅得漢奸黎一個，查實成個反中亂港集團由老到嫩一樣巴之閉，好似「雙學三子」獲終院終極放生，連洋人都吹捧佢哋攞諾貝爾和平獎；又好似長毛收受漢奸黎黑金「臭屎密冚」，法官大人一句「疑點利益歸被告」咁就甩難。法律面前反對派政客更平等，個個有免死金牌，仲唔係了不起？

諗起都唏噓，英國佬殖民管治香港逾百年，將小漁村變成國際金融中心，好了不起喇啩，點知回歸後香港不但冇更上層樓，反而喺短短廿一年極速墮落，一國兩制荒腔走板，港人治港走樣變形，法治廉政急劇褪色，甚至連過去傲視全球嘅基建工程都搞唔掂，豆腐渣遍地開花。殖民百年了不起，回歸廿一年鳥不起，嗚呼哀哉！

回歸以來，港府計劃多多，藍圖宏大，吹到天花龍鳳，殊不知講就天下無敵，做就無能為力，優勢產業唔見影，十大基建甩漏多，好似千億沙中線剪短鋼筋、漏放工字鐵、偷工減料乜都齊；又好似國家級基建港珠澳大橋同高鐵香港段弱不禁風，一落雨即變「水簾洞」。睇到喇，「工程藍圖了不起，漏水短筋鳥不起」；「納稅人出錢了不起，港府無能鳥不起」！

香港淪落至此，都要怪建制派唔爭氣，正一係扶唔起嘅阿斗。想當年廿三條立法，臨門一腳就係衰喺自己友倒戈；年前政改失敗，仲鬧出「等埋發叔」嘅笑話。咪睇上次立法會補選上演「大衞擊敗歌利亞」就沾沾自喜，實情係國家機器背後發功咋，仲未計反對派已經完成新老交替，反中亂港新兵源源不絕，話「反對派了不起，建制派鳥不起」就係咁解。

好彩香港仲有正義傳媒撐住啫，咁多年來，正義傳媒企喺對抗反中亂港勢力嘅最前線，孤身奮戰，搞到遍體鱗傷，身心俱疲。最可悲嘅係，港府敵友不分，是非顛倒，做盡親痛仇快嘅事，一旦連正義傳媒同第四權都鳥不起，香港肯定永遠鳥不起！

宋朝愛國詩人陸游話過，「楚雖三戶能亡秦，豈有堂堂中國空無人。」望係咁望喇，實情係中國人對住洋人就渾身唔自在，連狐假虎威嘅漢奸走狗都驚佢有牙，結果咪造成「反中亂港了不起，愛國愛港鳥不起」囉！結果咪港獨猖獗，台獨囂張，「五獨齊發」，「分裂了不起，統一鳥不起」囉！中央希望香港盡快就廿三條立法，遏止「獨草」蔓延，但咪畀人睇死，當局畏洋如虎，就算立咗法都唔夠膽執法，立一百條法都係鳥不起嘅咋！

敵友不分 親痛仇快

真係諗極唔明，港府就話充斥港英餘孽，同漢奸洋奴沆瀣一氣啫，但泱泱大國自比強漢盛唐，因乜解究連小小嘅香港都管唔掂呀？因乜解究要買反對派嘅怕，搞到愛國愛港陣營頭耷耷鳥不起呀？咁就要同大家講吓生物學咯。係呀，生物學，中國人嘅基因問題，呢門學問由魯迅講到柏楊，由「來生不做中國人」講到「小農DNA」，一再話畀大家知，自從鴉片戰爭後，中國人患上恐洋懼外症，見鬼就驚，見洋人就發軟蹄，連帶對洋人豢養嘅走狗都投鼠忌器，呢啲劣根性深入骨髓，唔會因為錢袋豐滿咗、國力增強咗而有所改變。

有辦你睇，舊年美國總統特朗普訪華受盡皇帝式招待，拎走二千五百億美元大單，仲有前排嘅「特金會」大出風頭，北京中間斡旋居功至偉，以為好心有好報，點知特朗普翻臉不認人，仲殺氣騰騰對中國發動貿易戰，無非要阻止中國崛起，要中國一世都鳥不起！

英國首相文翠珊都係一擔擔，收咗中國千億訂單，仲企喺道德高地對香港問題說三道四，連末代港督肥彭都加把口阿支阿左，最近又就《公安條例》口水多多。甚至連法國個奶油總統都踩到上心口，警告「一帶一路」唔好成為「新霸權之路」。一邊送錢畀人使，一邊送上門畀人鬧，唾面自乾，逆來順受，邊忽似大國崛起？與其肉包子打狗，一去無回頭，不如益吓自己同胞，將啲錢幫助貧困山區嘅學童讀書仲了不起喇。

既然鳥不起，自然飛不起，咪使旨意人哋睇得起。再咁落去，莫講話「大佬」普京睇唔起，「細佬」金正恩都笑你鳥不起，行穩致遠都變頭暈腳軟。本來呢，可以試吓啪番粒偉哥，洋為中用重振雄風，之但係偉哥始終係洋人發明，食偉哥咪即係向洋人服軟？咁啦，功夫茶醒條好橋，大國崛起靠自己，港府爭氣靠自己，不如中央委任叫阿「偉」嘅人去港府做官，咁就名副其實個個係「偉哥」，唔使靠洋人都可以鳥得起、硬得起，一國兩制同中國夢先至真正了不起！