中環出更：運房局屢爆鑊 何啟明寸符傳富仲肥咗
呢排高鐵同港鐵沙中線工程屢爆醜聞，包括高鐵試運行時車輪出軌、沙中線鋼筋疑造假、西鐵橋躉發生沉降，真係「鑊鑊新鮮鑊鑊甘」。立法會「峯搶手機」事件發生時喺現場嘅運輸及房屋局局長政治助理符傳富（Mark），理應要幫局長陳帆拆彈，應該忙到「有氣無碇抖」，做到瘦至啱，但佢竟然仲肥咗四十磅。連勞工界立法會議員何啟明都笑佢「肥肥白白」，唔同得佢落區曬到「黑黝黝」。聽落似寸Mark唔使做多啲。
何之前喺立法會遇到Mark，就話Mark依家肥肥白白，佢自己成日落區就曬到「黑黝黝」，唯一「自豪」就係有個肚腩仔，代表受街坊歡迎，成日有街坊畀嘢佢食。
符話累計幾年先肥咁多
Mark就好慨嘆咁話，其實佢都有瘦過嘅，就係二○一三年參加京士柏區議會補選嗰陣，選之前係一百六十幾磅，落區半年就輕咗廿磅，不過之後體重就反彈飆升，五年後嘅今日已經有成一百八十磅喇，真係唔講都唔覺佢咁有「肉地」。佢笑笑口話，自己係中央肥胖，強調係五年累計先肥咁多。照佢咁講，即係唔使落區先肥咗啦，睇嚟佢都係要學何咁多啲落區、「貼地」啲先得喇。
卓妮