中環出更：游水賺零用 容海恩游足25個塘
香港因為土地問題，市民就算有時間做運動都未必有場地，要預約政府體育場地亦爭崩頭。鍾意水上活動嘅立法會議員容海恩（Eunice）早前出席鄉議局一個酒會後講起，佢細細個成日去泳池，因為爸爸為咗鼓勵佢做多啲運動，就親身教游水兼利誘，每游一個塘可以有五毫子零用錢，所以佢就好勤力練習，賺埋啲錢去買雞翼同涼粉食，最高峰仲試過一次過游廿五個塘添。
不過香港泳池咁擠迫，好難游得順暢。Eunice即刻教路：「所以要報拯溺班囉！」原來報拯溺班好平，既可以用專用賽道練水，又可以考埋牌，一舉兩得，而佢都考到銅章。但佢就話，報讀康樂及文化事務署嘅獨木舟課程就必須要爭崩頭，因為名額好少，但好多人報完又唔出現喎。聽落都覺得好浪費名額，難怪佢都話政府真係要諗諗計先得喇。
工聯會會長吳秋北都係游泳健將，不過佢依家每次只係游十個塘，原因並唔因為佢冇Eunice咁fit，而係工作太忙，所以做運動通常都係得半個鐘左右。佢仲話自己去開維園或者筲箕灣嘅泳池，不過有時去到門口先知泳池要關閉，認為政府目前雖然有公告，但都冇人留意，所以都要改善通報機制先得喎。
沈豪傑街場打籃球大
元朗區議會主席沈豪傑就比較鍾意打籃球，細細個喺街場打到大，不過依家年紀大咗就唔曬得，要打番室內場。沈又話，元朗區議會都有同體育團體合作，舉辦唔同類型嘅運動，例如平衡車、單車、跳繩，甚至連冰壺都搞過。佢話要確保男女老少都可以一齊參與，平衡發展咁話。
卓妮