簡直豈有此理！香港公立醫院醫療事故已經去到一個離譜到冇人有嘅地步，近日有位老伯喺屯門醫院被人以硬物插肛喪命，咁無法無天嘅事都可以發生，醫管局管理水準有幾廢可想而知，病人條命又有乜辦法唔凍過水吖。
呢，屯院高層尋日就出嚟講番七十五歲末期腎衰竭男病人，淋浴期間懷疑被病房助理用硬物插肛門，直腸穿孔單嘢。佢哋話喎，病房助理只會協助病人沖涼，唔會幫忙通便，通便係醫療程序，要由醫生決定，護士進行，仲要喺病床上做，唔會喺淋浴地方做。所以院方覺得單嘢超越咗醫療事故，交畀警方處理，細節唔方便講。至於醫管局行政總裁梁栢賢就只係話事件罕見，又話醫院同病人溝通有改善空間。
大家睇到啦，病人入院醫病，最終竟然死於非命。醫管局到爆出咗隻大鑊，就企出嚟講兩句想打圓場，仲以交畀警方調查嚟轉移視線，淡化監管不力嘅責任。喂，依家講緊嘅係人命，呢班人若果係醫者父母心嘅，好應該畀番基本尊重啲病人，唔係每次出咗事就耍幾句官腔，將責任撇得一乾二淨。
你話唔係咩，與其噏埋啲咩改善醫院同病人溝通嘅廢話，不如認真徹查事件、追究責任仲實際。正如死者兒子話齋，父親被硬物插肛門時已經即時嗌痛要求停止，但對方並無理會又唔肯停手，咁離譜嘅事，點會係溝通不足咁簡單呀？如果話有人當老弱病人為出氣袋，將工作壓力發洩喺病人身上，卒之錯手搞出人命，會唔會更貼近真相呀？
唔止咁呀，死者個仔仲話事發後院方提出做手術有一半嘅致命風險，結果病人同家屬決定唔開刀。點知事後院方新聞稿就話係病人拒絕手術，講法不盡不實，擺病人上枱，明顯係推卸責任啫。到病人過身，家屬要報警，又有人要求唔好報警住，等醫護人員調查咗先喎。當然啦，屯院高層畀人踢爆後，又係例牌話呢啲只係溝通問題，否認蓄意隱瞞，信不信由你咁款。嗱，死者死前囑咐個仔要代佢討回公道，可想而知怨氣有幾大，話係含恨而終都冇誇張。
睇見就眼冤，近年公院醫療事故無奇不有，打錯針、輸錯血、開錯刀、配錯藥、切錯腳，只有想不到，沒有做不到，市民入院隨時小病變大病，大病變冇命。鬼咩，香港公營醫療體系千瘡百孔，醫管局呢個白色巨塔淨係識肥上瘦下，醫醫相護，每次出事都話調查，每次調查都係無人問責。香港人年年準時交稅，結果連睇病都要搵命博，怎一個慘字了得！