政府再度將觀塘海濱音樂噴泉同銅鑼灣摩頓臺活動中心嘅撥款項目，提交下月四日召開嘅立法會工務小組審議。老實講，呢兩個係區議會重點工程項目，但工務小組已兩度否決，觀塘區議會主席陳振彬同灣仔區議會主席吳錦津當然急如鍋上螞蟻，依家呢兩個項目第三度闖關，結果會係點？咁佢哋就要捉緊政府着緊啲去箍票，同埋拜託班建制派議員乖乖哋坐喺度投票，咪好似上次咁甩轆，若果重蹈覆轍，就凍過水嘞！
