政情：補選玩欽點惹不滿 小麗續游說民協
自決派劉小麗因宣誓無效被取消立法會議員資格（DQ），其議席將喺今年十一月二十五日進行補選。盛傳小麗將再參選但料會被DQ，所以提出欽點「Plan B」人選，卻惹來民協不滿。小麗尋日接受查詢時話會積極考慮參選，做民主派「Plan A」，兼且會繼續約民協一齊傾。
不惜犧牲一切 已約見本土派
小麗又話今戰係許勝不許敗，不惜犧牲一切，希望可以團結民主派。佢又話未來會繼續同民主派商討，近日更開始約見本土派，而佢個人及「小麗民主教室」就已加入工黨。至於有傳建制派邀請食物及衞生局前局長高永文參選，小麗就話，係真的話就要為市民討公道，狙擊高永文，有冇為自己施政失當感到內疚。佢舉例，如果高永文任內搞好墟市，早排一位喺天光墟擺檔嘅婆婆，或者唔會出意外身亡。