政情：原居民權益響喪鐘 劉業強冤過竇娥
好多時新界原居民遇到啲乜嘢問題，都會透過新界鄉議局向政府反映，但主席劉業強尋日喺鄉議局酒會上，當住一眾官員講到原居民嘅歸宿正敲響喪鐘，有六月飛霜嘅恐懼，令原居民感沮喪同失望。乜嘢事令佢覺得咁委屈，要嚟個「現代版竇娥冤」？
劉業強形容新界原居民正籠罩喺悲情之中，仲提咗幾次傳統權益正被挑戰，又指政府忽略咗新界原居民嘅基本需要，批評政府擁有逾千億元盈餘，但新界部分偏遠鄉村就仍然冇水電供應！交通配套等基礎建設一概欠奉，待遇極唔公平，難怪佢覺得原居民嘅歷史性權益正不斷被蠶食。
講到咁唔怕惹起政府反彈咩？睇嚟佢都有考慮呢點，所以都有讚吓政府有積極解決民生問題，但隨即話冇任何一個政府係完美，遇到問題就要面對同解決，強調天下間並冇解決唔到嘅問題，仲講到明叫政府履行憲法責任，保護原居民應有權益。
促港府撥亂反正
根據《基本法》第四十條，即「新界原居民的合法傳統權益受香港特別行政區的保護」，政府係應該確保新界原居民嘅傳統習俗同權益得以延續，雖然佢冇詳細解釋點樣受挑戰，但就期望政府撥亂反正咁話。聽到呢番話，政府應該畀啲反應喇！