政情：羅范呻錯入政府 唔做公職發咗達
好多人都話做公職係好大犧牲，但做到被冷待，就唔止犧牲，仲會傷心添嘞！下月即將卸任科技園公司董事局主席嘅羅范椒芬尋日喺傳媒茶敍度話，雖然唔想外界對佢嘅離任有太多揣測，然而講得最白嘅都係提起同創新及科技局局長楊偉雄「和而不同」時，佢嘅意見會不被接受，仲話唔係做公職，可能發咗達添！又呻話自己行錯路，入咗政府。睇到佢講到咁戚戚然，唔通係有感被冷待同懷才不遇？難怪唔少人都成日話「反中亂港有運行，愛國愛港冇前途」啦！
否認「和而不同」礙推創科
羅范以多句金句形容自己嘅離開，一時又話「成功不必我在，功成其中有我」，一時又話「我冇遺憾」，認為依家離任係合適時間。不過大家最關注都係佢同楊偉雄之間嘅關係，楊偉雄過往曾經形容二人「和而不同」，佢尋日舉例指自己認為科技園可以好似港鐵，喺外地輸出管理模式，又話「和而不同」完全冇問題，並冇難受嘅感覺，「我自己感覺我係從來冇阻住局長做嘢」，坊間流傳二人「和而不同」導致無法推動創科工作亦非屬實，「不過我啲意見不被接受咁囉」。係咪多數係佢輸呢，佢就笑指「咁權喺邊個度吖？你問都多餘」，但佢覺得咁樣並唔可惜。雖然佢全程笑住講，但係睇嚟都唔係做得太開心喎。
謝絕公職 「唔好再搵我笨」
卸任主席後，佢仍然係行會成員，但佢強調離開科技園後，發生緊乜嘢事，自己都未必跟得咁貼，都會懷疑自己畀嘅意見係咪最適合，日後唔想再「指指點點」嘞。佢仲話暫時無意再參與新公職，「唔好再搵我笨啦」。
佢又話過去多年瞓身搞創科，放棄咗啲嘢，希望日後多啲關注家族喺寧波設立嘅學校，亦希望多啲時間行山、做運動，探望兒孫。被問到會唔會覺得唔做公職就發咗達，羅范就話，「我又真係有啲咁嘅感覺(口架)，但我行錯路吖嘛，我入咗政府吖嘛」，仲講起有個坐隔籬嘅同班同學去咗澳洲做研究，真係發咗達添！
講起通識科檢討，羅范話當年有必要推行通識科，冇後悔，依家大學教授亦認為年輕人醒咗好多，通識科嘅關鍵在於老師係咪有足夠支援，以及同學係咪有足夠唔同角度嘅資料，最緊要係多角度思考，唔認同通識教到同學反動咁話。