中環出更：預防颱風邱詠麒綁樹護愛犬
夏天又到打風季節，唔少人都會預早做好防風措施，減低颱風對屋企嘅損害。卓妮早前喺馬場遇到百仁基金副主席邱詠麒（Josephine），佢講起住喺海邊，十號風球時，試過吹到花園啲樹嘅樹葉都落晒，今年都打算要綁實啲樹，以免吹冧啲樹枝，整親佢嗰七隻愛犬呀。
Josephine話屋企總共有七隻愛犬，全部都係大狼狗、洛威拿等大型品種，同佢家人感情相當好，每人負責照顧一隻，平日都會畀愛犬喺花園有蓋地方活動。香港嘅颱風咁強勁，佢話狗仔全部都好大膽又醒目，唔怕行雷閃電，亦會知道幾時打風，但佢就最怕吹冧啲樹枝會誤傷啲狗仔，所以會預先綁好。此外，佢亦會喺打風時黐「米」字膠紙落玻璃窗，雖然唔知有冇用，但黐咗都安心啲。
蕭楚基玻璃窗黐「米」字膠紙
本身做飲食業嘅仁愛堂前主席蕭楚基話，都會黐「米」字膠紙落玻璃窗，都係覺得黐咗安心啲，佢屋企約有二十年樓齡，舊年「天鴿」襲港時，玻璃窗嘅膠邊試過滲水，佢之後起晒啲玻璃膠，重新黐過，以免再有滲水，覺得無論係屋企定係舖頭，最緊要做好定期維修，咁就可以好好預防颱風吹襲。
轉頭見到中華廠商聯合會名譽會長顏吳餘英就孖住丈夫顏培英一齊現身，講起打風，佢話自己住半山，舊年打風都覺得間屋有啲震，間屋已經住咗廿幾年，當年有受鹹水事件影響，依家每十年會大裝修一次，換吓水喉管同電線，不過就唔打算搬嘞，因為景觀靚之餘，最緊要係風水好喎。
卓妮