政情：象哥為阿忠平反爆張超雄郭家麒先係逃兵
街坊工友服務處立法會議員梁耀忠（阿忠）做「逃兵」已經唔係新鮮事，佢喺今屆立法會起碼做咗兩次「逃兵」，包括前年立法會啱啱換屆後嘅首次會議，選立法會主席時，同埋今個月初喺《建造業議會條例》及《肺塵埃沉着病及間皮瘤（補償）條例》擬議決議案小組委員會選主席嘅時候，結果阿忠受盡千夫所指。不過進出口界議員黃定光（象哥）尋日就主動出嚟幫佢平反，話用「逃兵」形容阿忠並唔公道，因為真正嘅逃兵另有其人喎！
斥開會影都冇 不負責任
事緣尋日立法會大會通過咗《建造業議會條例》及《肺塵埃沉着病及間皮瘤（補償）條例》，象哥發言時就摷番小組委員會選主席嘅情況嚟講，話當時開會只得佢、阿忠同勞工界議員潘兆平三個人，因為係首次會議，所以由議員資歷最深嘅阿忠主持。象哥話，佢心諗條例冇乜爭議，阿忠又已經坐咗喺主席位，咁咪諗住畀佢做主席囉！
點知阿忠拒絕提名，結果就畀人鬧係逃兵，象哥直言咁講唔公道，因為佢當日都係開緊人事編制委員會期間，走過嚟頂住檔先。講講吓，象哥就爆肚話，真正嘅逃兵係提出成立小組委員會嘅工黨議員張超雄同埋公民黨議員郭家麒！事關佢兩個當日開會影都冇，非常不負責任。
象哥仲話，條例冇爭議就唔代表冇問題，既然召開咗小組委員會，就應該要仔細開會檢討，唔應該連影都冇。象哥愈講愈火滾，鬧晒成個泛民依家事無大小都要開小組委員會，搞到立法會成日要三、四個會議一齊開，咁樣只會拖慢立法會嘅運作咁話！
正當象哥狂鬧人嘅時候，咁啱輪到下一個發言嘅就係郭家麒，象哥於是點名叫佢解釋吓。不過郭家麒一開口就話毋須回應喎！唔通佢自知理虧，只會愈描愈黑，所以就少講為妙？