漫畫中嘅女角長相可愛，同時擁有一副魔鬼身材，令男人流晒口水，而喺現實中有冇呢類型嘅女子出現呢？嚟自南韓嘅模特兒徐多仁就係最佳人辦，佢擁有天使般可愛嘅樣貌，加埋激凸嘅身材及長腿，令人一見傾心。
樣貌可愛又迷人，足以成為男士心目中嘅女神，配合埋玲瓏浮凸嘅魔鬼級身材，更會令人產生心跳加速嘅感覺，難怪徐多仁甫出道就獲得極高人氣。同好多南韓模特兒一樣，徐多仁最初只係兼職做攝影模特兒，當其時佢只得16歲，一副稚氣未退嘅樣子，不過上圍卻豐滿脹卜卜，憑住童顏巨乳嘅特質，喺業界獲得相當高嘅注目度，亦因為咁嘅緣故，佢被事務所安排以Show Girl身份喺電玩展上登場，對於演出經驗甚淺嘅徐多仁嚟講，初次參與大型活動令佢感到十分緊張，有人問過佢仲記唔記得當時嘅表現如何，佢坦言緊張到個腦一片空白，幸好最後亦能夠順利完成工作。
人總係會成長嘅，累積愈嚟愈多嘅工作經驗後，徐多仁開始考慮一個問題，就係好唔好以模特兒作為未來職業，雖然佢身邊嘅朋友，認為佢未來嘅發展空間好大，但性格保守嘅佢仍希望得到屋企人嘅同意，好彩最終獲得屋企人嘅支持，但條件係佢一定要做到自食其力至得，就咁樣，佢喺20歲時正式成為職業模特兒。同之前做兼職最大嘅分別，就係佢要想辦法脫穎而出，不過其實佢嘅憂慮都係多餘，事關憑住佢嘅天賦條件，根本唔怕冇演出機會。
轉做全職之後，徐多仁除咗繼續攝影模特兒嘅工作外，更擴大發展空間，2011年首次以車模身份喺國際車展上亮相，憑住多年嚟累積嘅大型活動演出經驗，佢已經唔係當年初出茅廬嘅小妹妹，表現十分淡定，加埋魔鬼嘅身材及可愛嘅樣貌，輕易成為全場嘅焦點。自此以後，每當有大型國際車展，都總會見到佢嘅身影。同年佢又化身賽車女郎以超性感嘅造型登陸賽場，將激凸魔鬼身材展露無遺，而佢更被車隊睇中，成為旗下專屬車隊女郎，事業發展可謂一帆風順。
不過有趣嘅係，原來徐多仁自細嘅夢想係成為一位廚師，讀初中時便開始鑽研廚藝，曾到廚藝學校學習。既然係咁，點解佢又會放棄呢個夢想呢？徐多仁表示由於學廚生涯相當辛苦，加上佢體質比較弱，要喺悶熱嘅廚房內工作，實在令佢吃不消，咁啱當時有人問佢有冇興趣做兼職模特兒，結果佢便答應。不過徐多仁又話自己一直以嚟都冇放棄過做廚師嘅夢想，平日都會下廚一番，更希望將來開一間餐館，一償夙願。
簡介：徐多仁公認係天使與魔鬼嘅混合體，不過佢唔覺得自己嘅身材突出，仲話比佢身材更好嘅模特兒有唔少。問佢覺得自己身體邊個部位最吸引，佢就話係一對修長美腿，唔知大家同唔同意呢？如果大家想了解佢多啲，就要Click入呢個網站喇！
網址：http://cafe.daum.net/lovely-dain
出生地：首爾
身高：173cm
三圍：35-24-35
撰文：魂