中環出更：林卓廷「出賣」黨友 陳恒鑌為肥尹解圍
立法會尋日審議《2018年道路交通（修訂）條例草案》，將的士及公共小巴司機證由每年更換改為十年。立法會議員林卓廷（阿廷）就提出修正案，要求將十年有效期改為五年。為咗支持自己嘅主張，佢不惜「出賣」黨友、立法會議員尹兆堅（肥尹），話肥尹十年前同十年後個樣係兩回事喎。
話說唔贊成修正案嘅議員陳恒鑌（Ben）發言時，一度舉起多人十年前同十年後嘅對比照片，包括立法會前議員劉慧卿（卿姐），仲話睇卿姐十年前後都仲可以認得到，藉此力撐政府十年換證冇問題。
稱尹好食好住先模糊咗
阿廷就話，相信卿姐聽到會好高興，但坐佢隔籬嘅肥尹十年前後就係兩回事，認為十年先換證太耐。Ben聽到就為肥尹解圍，話開頭都有諗過「呢個係咪以前嘅尹兆堅？」但其實都只係少少差別，係認到佢嘅，仲話肥尹可能係「好食好住」先「模糊咗啲」，減番磅輪廓就會返番嚟，仲強調對肥胖唔應該有偏見喎！最後阿廷嘅修正案被否決，政府嘅條例草案就獲通過。
卓妮