今時今日嘅香港地，只要夠惡夠狠夠大膽就無敵。唔信嘅，睇吓深水埗通州街天橋底嘅「南亞村」吖，屹立多年而不倒，六大政府部門一直唔敢動其分毫，南亞兵團鍾意喺度開毒窟淫竇又得，做武器庫又得，黑幫開壇收𡃁都仲得，肆無忌憚，無惡不作，咁咪得米囉。
唔係講笑，南亞村呢個治安大毒瘤都困擾咗西九龍街坊好耐，唔理區議會或居民點樣投訴都好，一樣吹佢唔脹。冇錯，警方、勞工處等執法部門耐唔耐就會殺上門拉人封艇，仲檢獲唔少毒品同武器添，日前嘅「撒哈拉」行動又拉咗一批假難民同黑工，係威係勢咁款。可惜吖，每次執法都係一陣風，第二日又打回原形，即係嘥氣。
係人都知，南亞村一日唔剷除，假難民一日有安樂窩，藏污納垢就係必然嘅事。正如本報多次指出，呢個唔止係治安、僭建同衞生問題，仲牽涉族群政策、難民政策、社會福利等棘手問題，食環署、路政署、地政總署、康文署、民政事務總署及社會福利署六大部門統統關事，個個可管，弊在政出多門，互相扯皮，結果六個和尚冇水食。好似上月食環署帶隊拆屋，一行人浩浩蕩蕩，點知搞咗大半日，只係拆咗一間木屋咁大把，擺明做騷啫。
咁講喇，既然港府怕咗假難民，六大部門都對南亞村冇符，便宜不檢白不檢，等功夫茶醒條好橋，南亞兵團一於玩大佢，唔好起木板屋嘞，改用磚頭水泥建屋，咁就翻風落雨都唔怕，仲要起足四、五層，到時威過新界原居民，事關丁屋都係三層高咋，話唔定原居民都要跟佢哋學嘢。仲有喎，天橋底始終唔夠風涼水冷，邊好住o架，不如搬去禮賓府、門常開，既有超級大花園，又有青葱大草地，仲要位處黃金地段，升值潛能毋庸置疑。再唔係，搬去山頂、淺水灣呢啲有錢佬地方，有無敵大海景，又係風水寶地，諗起都爽歪歪。
嗱，想當年佔領鬧劇玩咗七十九日都要收皮，但南亞兵團唔係學生哥，佢哋孔武有力，鍾意佔領幾耐都得，只要霸佔官地六十年、私地十二年，咁就可以名正言順逆權侵佔，到時仲唔發過豬頭咩。所以話啫，香港地遍地黃金，幾好都有，假難民唔嚟就笨吖。話時話，呢兩日銅鑼灣同元朗都有南亞兵團罪案發生，但都係啲細雞嘢，點會發達o架，既然咁遠水腳嚟到香港，梗係要食大茶飯啦。
冇計嘞，回歸本來好光彩，香港回歸就搞成咁，連拆條南亞村都搞唔掂，阿爺又乜都睇唔到咁款，香港冇用o架嘞，留畀南亞兵團玩晒算數喇。