政情：勉勵港青北上發展 霍啟剛籲憑興趣搵方向
近年港府經常鼓勵年輕人返內地發展，其實年輕人返到內地又有幾大優勢？香港青年聯會前主席霍啟剛尋日出席一個論壇，講到年輕人返內地嘅發展情況，認為每個年代都有唔同嘅機遇，好似佢爺爺、已故全國政協副主席霍英東早喺八十年代，返去廣州開酒店賣牛角包，當時廣州人少車少，呢個決定可謂史無前例，正正因為咁證明佢爺爺捉到當年嘅機遇喇！
霍啟剛仲話環境不斷變化，以前內地經濟以出口為主，改為主打投資同內銷；以前啲人消費多數係買實物，今時今日就以心靈上嘅消費為主，例如旅遊、文化、體育、藝術等，而佢自己近期就投資電競業，認為年輕人初初係需要探索，但相信唔少年輕人可以憑自己興趣搵到方向。
身體力行帶團考察
佢仲身體力行，下星期一帶青年團到深圳、武漢、北京等三個城市，睇吓當地嘅發展，期間有機會同國家領導人會面，屆時香港年輕人亦可直接向國家表達意見喇！