政情：平權動議面目全非 慢必批梁美芬騎劫
近年同志平權議題爭議不斷，首名「出櫃」嘅立法會議員陳志全（慢必）將就同志締結伴侶關係嘅政策，下月四日喺立法會上提出無約束力動議，同時反對同志平權嘅經民聯梁美芬則提出修正案，卻刪除大量字眼，換上「維護婚姻制度」、「一男一女」等字眼。慢必尋日喺傳媒茶敍上批評，梁美芬連佢所帶出嘅主題亦刪除，係「騎劫」佢嘅動議喎。
指修正案違背原意
慢必話提出動議唔係要宣洩立場，而係希望引起同政府之間嘅討論，從而研究同性伴侶嘅政策，令同性伴侶享有與異性伴侶平等嘅權利。對於現時梁美芬嘅修正案，佢認為係完全違背原意，立法會主席唔應該接納梁美芬嘅修正案，所以佢去信立法會主席梁君彥同內務委員會主席李慧琼，要求喺會上討論其接納理由，同時批評梁君彥嘅判斷有問題。
另一方面，由於議題具爭議性，慢必預計其議案會遭否決。同時，現時民主派喺地方直選只得十六席，而建制派則有十七席，佢擔心梁美芬嘅修正案或獲通過，又指雖然動議係無約束力，但憂獲通過嘅修正案或會被誤會為立會嘅立場。