政情：憶八一八事件 徐立之：瞓得幾好
香港大學「八一八事件」係前校長徐立之任內嘅一件大事，徐立之尋日出席活動時，提起出任校長時嘅經歷，佢話當時認為做校長唔係政治工作，而係本住「教學、團隊、貢獻」去做事，大事發生時唔會瞓唔着，反而人事問題等小事就最麻煩，被問到八一八事件瞓唔瞓得着，佢坦言「瞓得幾好」。
「對事不對人」 冇同梁智鴻不和
徐立之話，佢當時覺得八一八事件應該好似當日咁處理，不過承認有講錯嘢，社會亦唔原諒佢，但佢亦唔會出聲，以免愈抹愈黑。佢話做科學嘅人發現有問題，會畀意見去解決，唔係批評個人，但社會上好多時都會將人同事夾埋去睇。被問到外界曾傳出佢同時任校委會主席梁智鴻（金刀梁）不和，徐立之就重提佢哋當時每周食一次早餐，好多偈傾，重申自己係做科學嘅人，「對事不對人」，有時講嘢都會唔客氣，佢近日仲應金刀梁邀請出席一個節目添！
同場嘅金刀梁就重提，當年曾經提出以五年合約希望徐立之留低，但徐立之希望做科研，所以冇答應，而其後接任嘅前校長馬斐森最終並無做足五年任期，金刀梁話覺得好失望。