中環出更：馬逢國議案唔過 劉國勳累街坊？
立法會尋日辯論由體育、演藝、文化及出版界立法會議員馬逢國提出嘅有關開拓場地支持本地文化藝術及康體發展嘅議案。議案多個修正案獲通過，但原議案反而被否決。喺建制派佔多數嘅議會形勢下，點解屬建制陣營嘅馬逢國會甩轆？原來係因為民建聯劉國勳提出嘅修正案累事。
話說新民黨葉劉淑儀、劉國勳、公民黨陳淑莊同獨立民主派區諾軒等四名議員都對原議案提出修正案，當中只有區諾軒嘅修正案被否決，其餘三人嘅修正案均獲通過。連修正案都獲通過，原議案何解會「出事」？
民主派反對劉 連累原議案
民主派會議召集人、資訊科技界議員莫乃光解釋，民主派並非反對原議案，只係劉國勳嘅修正案其中一條係要求採取措施協助藝團同內地表演場地建立聯繫同合作，認為咁樣會影響本地藝團創作自由，所以反對劉嘅修正案。由於劉嘅修正案喺建制派支持下獲通過，民主派咪唔支持經劉修正嘅原議案，最終只能投棄權票。所以講到尾，都係劉國勳累事喇！
不過又唔可以怪晒劉國勳嘅，事關原議案喺功能界別都獲通過，只係地方直選界別支持票同民主派嘅棄權票打成平手，原議案先因未獲兩界別通過而被否決。立法會直選建制派有十七人，民主派只有十六人，馬逢國要怪就只能怪建制派唔坐定定撐佢喇！
卓妮