中環出更：鍾國斌話科技進步帶動時裝設計
香港理工大學早前一批紡織及服裝學系嘅學生畢業，在場的立法會紡織及製衣界議員鍾國斌話今時今日嘅設計除咗有新意，仲非常實際，加上科技進步，新技術、新原材料不斷湧現，令好多設計可以實實在在造出嚟，學生嘅創意亦都可以發揮得更完善。
講到政府投放唔少資源落創意產業，鍾國斌話其中一項就係落實深水埗作為時裝基地，由於深水埗過往係時裝採購嘅重地之一，若將深水埗打造成時裝中心嘅話，相信好快就可以見效，可以吸引多啲唔同海外買家，甚至旅客嚟深水埗了解香港時裝設計嘅發展，打破過往只係「鬥平」嘅局面，令香港可以發展更多高質素嘅時裝設計。
嚴志明話家居設計都有時裝展
理大校董會副主席林大輝亦話今時今日科技發達，依家嘅學生比以前嘅幸福得多，有好多電腦軟件可以用，相比舊時次次都要用手畫真係辛苦得多。加上時裝設計講求潮流觸覺，舊時資訊冇咁發達，對潮流脈搏掌握得冇咁足，咁對市場嘅了解都會好有影響。
時裝設計就話可以天馬行空，唔知家居設計會唔會好多掣肘？始終家居好多時講用途，成品體積亦較大，睇落會多好多限制，但香港設計委員會主席嚴志明話設計最重要都係講創意同設計意念，所以時裝同家居都係一樣，有時推出一批新嘅家居設計時，會採用相同嘅布料、顏色整一套衫，再搵模特兒去搞一場「時裝展」，從中表現設計意念，所以所有設計都係由無變到有，只係製成品唔同啫！
卓妮