家明說：「今日天陰陰，我哋喺呢種天氣行山真係好舒服。」
國強說：「但天文台話今日會有驟雨，局部地區有雷暴添呀！」
家明說：「放心啦，如果落雨，我哋就喺大樹底下避一避囉。」
國強說：「你錯喇，2013年就因為有兩兄弟急忙喺大樹下避雨，旁邊大樹被雷電擊中，因電壓極大，佢哋被雷電波及受傷。其實閃電通常會尋找比較高聳嘅物體為目標，因為高聳嘅物體係地面上最彎曲嘅部分，會集中較多嘅電荷，而放電嘅機會較高及較易被雷電擊中，所以較高嘅大樹易被閃電擊中。而閃電嘅威力太強，大樹根本無法抵禦而被電殛至燒焦或破開，因此我哋企喺樹下，難免受到牽連而受傷，甚至被雷電波影響觸電死亡。」
家明說：「嘩，咁當雷暴生效時，如果喺室外嘅話，有咩要留意？」
國強說：「喺室外嘅人士，應躲入建築物內。切勿企喺山頂上或接近導電性高嘅物體。樹木或桅杆容易被閃電擊中，應盡量遠離。閃電擊中物體後，電流會經地面傳開，因此唔好瞓喺地上，潮濕地面尤其危險。應該蹲着並盡量減少同地面接觸嘅面積。切勿游泳或進行其他水上運動。離開水面及找尋地方躲避。而且喺雷暴時，唔好喺室外使用手提電話，因為有機會導致觸電。」
家明說：「如果同行朋友不幸被閃電擊中，我可以做乜嘢？」國強說：「首先，喺自身安全情況下，將傷者同你自己移到安全地方，立即檢查傷者情況及報警求助。如傷者無呼吸或心跳，需立即因應情況進行心肺復甦法及人工呼吸。今日天氣咁差，不如我哋留喺室內打羽毛球啦！」
職業安全健康局
www.oshc.org.hk