政情：高鐵附例會議 建制泛民鬥玩嘢

話說喺選出主席時，先由進出口界黃定光提名民建聯嘅陳克勤，而公民黨陳淑莊則提名人民力量陳志全（慢必），最終陳克勤以二十票擊敗只得十票嘅慢必當選主席。

建制派包攬正副主席

而喺提名副主席期間，慢必提名自決派朱凱廸，而建制派何君堯則提名民建聯陳恒鑌。陳恒鑌雖接受提名，但最後認為航運交通界嘅易志明較適合而提名對方。陳恒鑌喺選舉前，曾表態指小組委員會唔需要有副主席，佢喺派發選票前再次提出質疑，民主派會議召集人莫乃光隨即大叫批評佢，「咁你想點啫，使唔使咁寸，講嚟講去都係唔想畀我哋做啫！」陳恒鑌則反駁，指自己只想了解副主席係咪必要，並反問「唔知點解會激到莫乃光跳掣」。擾攘一番後，最終易志明同樣以二十票擊敗取得十票的朱凱廸當選副主席。

針對有關附屬法例，保安局副秘書長黃少珠指入境處喺機場、深圳灣口岸等管制站設羈留所，故喺西九龍站亦須設立，並列為指明管制站，讓入境處執行日常出入境管制同執法工作。而小組委員會提早完結，料於下月初提交予立法會大會。