政情：誤打誤撞入行 劉楚釗急症室覓使命感
曾肩負起「海外救人英雄」之名嘅港島東醫院聯網總監劉楚釗今個月尾退休，而佢喺做東區醫院院長前係本港外派嘅救援專家，參與過無數大型災難嘅救援，包括南亞海嘯、台灣九份車禍、四川地震同馬尼拉人質事件。叫佢用一句話總結過去嘅救人威水史，謙虛又愛自嘲嘅佢話：「我都係打工啫，無國界醫生嗰啲先係英雄呀！」
喺公立醫院做咗三十五年，提起後生時「入行」經過，劉醫生又發揮佢嘅自嘲能力：「細個讀書幾好，又咁啱考到醫生，咪做囉，絕對唔係大家諗嗰種六歲就雄心壯志咁話使命係要做醫生救人，哈哈！」佢仲話當年其實想做外科醫生，但自知唔係最叻嗰一批，最後就喺急症科扎根。雖然誤打誤撞入行，但佢喺救急扶危嘅急症室搵到救人嘅使命感同滿足感。
月尾退休後遊張家界
佢原定十月先退休，但扣埋假期，做到今個月廿九號就會離開醫管局，會去張家界旅行，而接替佢個位嘅係現任港島西醫院聯網總監陸志聰。其實佢係退而不休，自爆八月就會返新工，但唔會再執手術刀，而係繼續做管理層。係咪出私家醫院做？佢就賣晒關子唔肯講。