政情：小組委員會選主席 阿忠又做逃兵
街坊工友服務處立法會議員梁耀忠（阿忠）再做「逃兵」！前年立法會換屆後首次會議，阿忠原本要擔任代主席以選出立法會主席，點知當時佢就做「逃兵」臨陣退縮，最後就畀網民，甚至同佢同屬泛民陣營嘅人都鬧爆。最近立法會一個小組委員會上需要選出主席，阿忠就被提名做主席，點知佢又做「逃兵」，拒絕接受提名，最後主席之位就由工聯會嘅勞工界議員何啟明接手。民主派過往成日都批評建制派橫行霸道，霸住立法會啲委員會嘅正、副主席職位，今次就拱手讓人，真係矛盾喇！
話說立法會根據《建造業議會條例》及《肺塵埃沉着病及間皮瘤（補償）條例》提出嘅擬議決議案小組委員會早前召開首次會議，會議首項議程就係要選出小組委員會嘅主席。阿忠因為議員資歷較深，按慣例主持會議至選出新主席。當時開會嘅只有阿忠、進出口界議員黃定光（象哥）同勞聯嘅勞工界議員潘兆平三人。
象哥潘兆平都耍手擰頭
象哥就提名阿忠擔任主席，點知阿忠即刻話「千祈唔好，我唔鍾意做」，又話自己咁多年都冇大做過，反叫象哥誓任主席，因為象哥都做過好多次委員會主席咁話。象哥就回應「好牛唔好使死牛」，又提議阿忠「處男下海」，轉頭又問立法會秘書處同事，有冇試過冇主席都可以開會。
阿忠見象哥都耍手擰頭，就改向潘兆平埋手。但潘兆平亦都唔肯做主席，話要「論資排輩」，又問點解成日要求成立小組委員會嘅工黨議員張超雄唔見人。象哥聽完就扯火鬧爆︰「叫成立小組嘅人今日都唔嚟開會，郭家麒、張超雄做咩？覺覺豬緊呀？玩咩啫佢哋？做人唔係咁o架嘛！」象哥說罷就話要走人，開另一個會。由於三人互相推嚟推去十五分鐘都搞唔掂件事，阿忠惟有宣布暫停會議。
最後會議喺五分鐘之後恢復，張超雄同何啟明現身開會，但象哥同潘兆平就已「逃離現場」。小組委員會主席職位就由何啟明喺冇競爭下當選出任。
阿忠做「逃兵」已經唔係第一次，二○一六年立法會換屆後首次會議，由於當時最資深嘅議員涂謹申競逐主席，作為第二資深議員嘅阿忠就要主持會議，選出新一屆立法會主席。當時阿忠以無法有效主持為由，主動放棄主持，令會議改由建制派掌控大局，當時泛民支持者都狠插阿忠。今次阿忠又做「逃兵」，好明顯係冇吸取到教訓喇！