中環出更：拓生產線成本低 王偉睇中巴基斯坦
有「拖鞋大王」稱號嘅香港品牌總商會（商會）會長王偉最近密密到巴基斯坦、孟加拉考察，驚嘆當地成本低、商機無限，好似內地四十年前改革開放初期咁。佢笑笑口話當年冇機會喺內地執到嘅，依家要把握機會去執番喎。
早前商會舉行午餐講座，一眾商會成員齊探討東南亞一帶一路嘅國家商機，巴基斯坦駐港澳總領事商務官員亦到場簡介當地投資環境。王偉都去過兩次巴基斯坦考察，對當地投資環境讚不絕口。佢話喺內地嘅鞋廠已經應付唔到訂單，需要擴充生產線，但係現時經濟前景唔明朗，貿貿然設廠風險好大，所以打算直接將部分訂單落到巴基斯坦嘅廠家，可節省二至三成嘅成本添！
劉永信籲投資前向朋友打探
同場仲有商會常務副會長陳彩雲、副會長黃業光、鄭陳曼芝、劉永信同理事周勤輝等人，劉永信亦同大家分享喺柬埔寨投資嘅經驗。佢做服裝商標織造同印刷生意，由於內地廠生產成本愈來愈高，兩年前就轉移到柬埔寨設廠。
劉永信話當地投資環境優點多，包括冇外匯管制，呢樣係對中小企業資金流動好重要，但當地基建落後，而且假期多，有時官方會突然來信通知話因乜乜原因，某日係有薪假期，所以港商去投資前最好問吓已去投資嘅朋友，以免失預算。
現場仲有唔少新加入嘅會員，包括做南美健康食品入口生意嘅劉鎮榮、做西班牙高級食材生意嘅靚女吳翠鳳同珠寶設計師邵燕寧等人。其中劉鎮榮係黃業光嘅姨甥，自細喺南美委內瑞拉長大，所以識講西班牙話，同樣喺西班牙住咗幾年嘅吳翠鳳初相識即用西班牙話溝通，感覺好親切添！
卓妮